मेरी कोमनंतर प्रियांका साकारणार पी. टी. उषा

मुंबई : ऑलिम्पिक पदक विजेती भारतीय बॉक्सर मेरी कोम हिच्यानंतर बॉलिवूडची ‘देसी गर्ल’ प्रियांका चोप्रा आता प्रख्यात धावपटू पी. टी. उषा हिच्या जीवनावर आधारित चित्रपटात झळकणार आहे. पी. टी. उषाची भूमिका प्रियांका स्वत: करणार असल्याचं समजतं.
मेरी कोम हिच्या जीवनावर प्रियांकानं केलेला चित्रपट बराच गाजला होता. त्यातील प्रियांकाच्या भूमिकेचं कौतुक झालं होतं. हे लक्षात घेऊनच प्रियांकाला पी. टी. उषाच्या भूमिकेसाठी विचारण्यात आल्याचं सूत्रांकडून समजतं. इतकंच नव्हे तर, या चित्रपटाच्या संगीतासाठी सुप्रसिद्ध संगीतकार ए. आर. रेहमान यांच्याशी संपर्क साधण्यात आला आहे. या दोघांनीही अद्याप या वृत्ताला दुजोरा दिलेला नाही.
तामीळ आणि मल्याळम भाषेत अनेक हिट चित्रपट देणाऱ्या दिग्दर्शक रेवती एस. वर्मा या चित्रपटाचं दिग्दर्शन करणार आहेत. चित्रपटाचं एकूण बजेट १०० कोटी असून हिंदी, चिनी, इंग्रजी आणि रशियन भाषेत हा चित्रपट प्रदर्शित होईल, असं सांगितलं जातं. हॉलिवूडमध्ये रमलेली प्रियांका या चित्रपटासाठीच भारतात परतल्याचं बोललं जातं.