बुलडाणा: देवदर्शनाहून परतताना अपघात, ३ ठार

बुलडाणा। (PNE)- बुलडाण्यातील जाईचा देव येथून देवदर्शनाहून परतताना चिखली-मेहेकर मार्गावर भाविकांचे वाहन उलटले. या भीषण अपघातात एकाच कुटुंबातील तिघांचा मृत्यू झाला. तर इतर ५ भाविक जखमी झाले आहेत. या अपघातातून चार महिन्यांचे बाळ बचावले आहे.

नांदेड जिव्ह्यातील उमरी येथील भाविक जाईचा देव येथे दर्शनासाठी गेले होते. दर्शनानंतर ते चारचाकी वाहनाने नांदेडला परतत होते. चिखली-मेहेकर मार्गावर हिवरा आश्रमाजवळ चालकाचे वाहनावरील नियंत्रण सुटून ते उलटले. या भीषण अपघातात तिघांचा जागीच मृत्यू झाला. तर पाच जण गंभीर जखमी झाले आहेत. मृतांमध्ये महिलेचा समावेश असून तिचे चार महिन्यांचे बाळ बचावले आहे. जखमींवर खासगी रुग्णालयात उपचार सुरू आहेत. अपघातानंतर वाहनचालक घटनास्थळावरून पसार झाला आहे. दरम्यान, अपघातग्रस्तांची नावे अद्याप समजू शकलेली नाहीत.