जगताप डेअरीकडे येणा-या मार्गांवर वर्दळीच्यावेळी जड वाहनांना प्रवेश बंद

पिंपरी। (पीएनई)- जगताप डेअरी येथे सध्या उड्डाणपुलाचे काम सुरु आहे. मात्र, या कामामुळे सकाळी व सायंकाळी वर्दळीच्या वेळी मोठी वाहतूक कोंडी होत आहे. ही वाहतूक कोंडी टाळण्यासाठी सांगवी वाहतूक पोलिसांनी सकाळी साडे सात ते साडेअकरा व सायंकाळी चार ते साडेनऊ या वर्दळीच्या वेळी जड वाहनांना बंदी केली आहे.

वाहतूक पोलिसांनी दिलेल्या निवेदनानुसार, काळेवाडी फाटा ते जगताप डेअरी व कस्पटे वस्ती ते जगताप डेअरी या दोन मार्गावरुन बस, खासगी बस, ट्रक व इतर जड वाहनांना सकाळी सात ते साडेअकरा व सायंकाळी चार ते साडेनऊ या कालावधीत प्रवेश बंद असणार आहे. ही बंदी जगताप डेअरी चौकातील उड्डाणपुलाचे काम पूर्ण होईपर्यंत कायम राहणार आहे. यामध्ये शासकीय बस, रुग्णवाहिका व अग्निशामकदल अशा अतिआवश्यक सेवांना मात्र मुभा देण्यात आली आहे.

डांगे चौक, काळेवाडी फाटा या भागातून पुण्याकडे जाणा-या खासगी बसचे प्रमाण खूप आहे. त्यात जगताप डेअरी चौकात सध्या पुलाचे काम सुरु असल्यामुळे कार्यालयात जाताना व कार्यालयातून घरी परत येण्याच्या वेळेमध्ये मोठी वाहतूक कोंडी होत आहे. त्यावर उपाय म्हणून वाहतूक पोलिसांनी सकाळी व सायंकाळी वर्दळीच्या वेळी जड वाहनांना बंदी या भागात प्रवेशास बंदी केली आहे.