भटक्या कुत्र्यांना जिवंत जाळले; बाणेर वस्तीमध्ये धक्कादायक प्रकार!

पुणे: भटक्या कुत्र्यांचा त्रास होतो म्हणून महापालिकेकडे दाद मागण्याऐवजी काही लोकांनी कुत्र्यांना जिवंत जाळल्याची धक्कादायक माहिती पुढे आली आहे. बाणेर वस्तीमध्ये हा प्रकार घडला असून, चार कुत्र्यांना जाळून तर १६ कुत्र्यांना विष पाजून ठार मारण्यात आले आहे. या प्रकरणी बुधवारी रात्री उशिरापर्यंत चतुश्रृंगी पोलिस स्टेशनमध्ये तक्रार नोंदविण्याची प्रक्रिया सुरू होती.
’अॅक्शन फॉर अॅनिमल्स अगेन्स्ट क्रुएल्टी अँड ट्रॉमा’ या संस्थेच्या सदस्यांना गेल्या आठवड्यात कुत्र्यांना जिवंत जाळल्याची माहिती मिळाली. ‘आम्ही तातडीने बाणेर येथील पॅनकार्ड रस्त्यावर जाऊन पाहणी केली. रस्त्यालगतच्या झुडपांमध्ये कुत्र्यांच्या मृतदेहाचे जळालेले अवशेष तसेच कुजलेल्या अवस्थेतील कुत्र्यांचे मृतदेह सापडले. या संदर्भात आम्ही पोलिसांना माहिती दिल्यावर त्यांनी लगेच घटनास्थळी जाऊन पंचनामा केला,’ अशी माहिती संस्थेच्या स्वयंसेवक नीना राय यांनी दिली.
कुत्र्यांच्या शवविच्छेदनाचा अहवाल आल्यानंतर पुढील कारवाई करण्यात येणार आहे. यापूर्वी देखील या भागात भटक्या कुत्र्यांची हत्या करण्यात आल्याची शक्यता आहे. या भागातील नागरिकांशी चर्चा केल्यावर त्यांनी काही लोक चार कुत्र्यांना दोरीने बांधून फरपटत नेत असल्याचे पाहिल्याचे सांगितले. त्या तरुणांनी कुत्र्यांच्या अंगावर रॉकेल ओतून त्यांना पेटवून दिल्याची माहितीही पुढे आली आहे. आतापर्यंत जाळलेली चार आणि विष देऊन मारलेली सोळा अशी वीस मृत कुत्री सापडली आहेत, असे राय यांनी सांगितले.