योग्य व्यक्तींचा सन्मान होत नाही;विश्वनाथ प्रसाद तिवारी यांची खंत

पुणे : ‘ज्या समाजात योग्य व्यक्तीचा सन्मान होत नाही, तो समाज गडबडलेला असतो. आपण ज्यांचा सन्मान करायला नको अशांचा करतो आणि ज्यांचा केला पाहिजे त्यांचा करत नाही. ही आपल्याकडील पद्धत आहे,’ या शब्दांत साहित्य अकादमीचे अध्यक्ष विश्वनाथ प्रसाद तिवारी यांनी बुधवारी देशातील पुरस्कार संस्कृतीवर ताशेरे ओढले. ‘ज्या भाषांनी भारताला घडवले, त्यासाठी डॉ. म. अ. मेहेंदळेंनी आपले आयुष्य वेचले. त्यांचा सन्मान हा आमचाच सन्मान आहे,’ असे त्यांनी आवर्जून नमूद केले.
साहित्य अकादमीतर्फे प्राचीन विद्या, भाषा, धर्म व संस्कृती या विषयांचे गाढे अभ्यासक प्रा. डॉ. म. अ. मेहेंदळे यांना तिवारी यांच्या हस्ते ‘साहित्य अकादमी भाषा सन्मान’ प्रदान करण्यात आला. त्या वेळी ते बोलत होते. मनोहर मंगल कार्यालयात झालेल्या कार्यक्रमाला अकादमीचे सचिव के. श्रीनिवासराव, मेहेंदळेंचे चिरंजीव कर्नल (निवृत्त) प्रदीप मेहेंदळे, अशोक मेहेंदळे आणि सून रोहिणी मेहेंदळे उपस्थित होते.
‘देशात संस्कृत भाषेसाठी चांगले वातावरण नाही. संस्कृत, पाली या भाषांनी भारताला घडवले असून, अशा भाषांसाठी मेहेंदळेंसारख्या विद्वानांनी योगदान दिले. आपला समाज भाषा आणि साहित्यामुळेच टिकून आहे. आपल्यामुळे भाषा आणि साहित्य टिकलेले नाही,’ याकडे तिवारी यांनी लक्ष वेधले.