मीही लैंगिक अत्याचाराची बळी: पुनम महाजन

अहमदाबाद। माझ्यासह प्रत्येक महिला कधी ना कधी लैंगिक अत्याचाराची बळी पडलेली आहे, असं सांगून जर कोणी तुम्हाला त्रास देत असेल तर सरळ त्याच्या कानशिलात ठेवून द्या, असं आवाहनच भाजप खासदार पुनम महाजन यांनी केलं.
अहमदाबाद येथील ‘इंडियन इन्स्टिट्यूट ऑफ मॅनेजमेंट’च्या एका संमेलनात आयोजित ‘ब्रेकिंग द ग्लास सिलिंग’ या विषयावरील परिसंवादात पुनम महाजन बोलत होत्या. त्या म्हणाल्या, जेंव्हा माझ्याकडे कारने जायला पैसे नसायचे. तेंव्हा मी वरळीवरून वर्सोवाला क्लासला जाण्यासाठी रेल्वेने प्रवास करायचे. तेंव्हा लोक माझ्याकडे कामूक नजरेनं पाह्यचे. पण या प्रकाराने मी विचलीत होत नसे. स्वत:ला कमकूवत समजत नसे. माझ्यासारखीच अशी परिस्थिती तुमच्यावर ओढवली आणि तुमच्याकडे जर कोणी वाईट नजरेने पाहत असेल तर स्वत:ला कमकुवत समजू नका. अशा प्रकारच्या परिस्थितीशी सामना केलेल्या पृथ्वीवर अनेक महिला आहेत. विशेष म्हणजे भारतात तर खूपच आहेत. प्रत्येक महिलेवर शेरेबाजी करण्यात आलेली आहे. तिला चुकीच्या पद्धतीने स्पर्श करण्यात आला आहे, असं त्यांनी सांगितलं.

अमेरिकेती महिलांपेक्षा भारतातील महिलांनी अधिक प्रगती केल्याचंही त्यांनी सांगितलं. अमेरिकेत अजून पर्यंत महिला राष्ट्रपती झालेली नाही. मात्र आपल्याकडील महिला राष्ट्रपती, पंतप्रधान, संरक्षण मंत्री आणि मुख्यमंत्रीपदासह सर्व पदावर पोहचल्या आहेत. त्यांनी ‘ग्लास सिलिंग’ला तोडले आहे. ही मोहिम पुढे नेण्याची जबाबदारी आपल्यावर आहे, असं त्या म्हणाल्या. जर कोणी तुम्हाला त्रास देत असेल तर त्याच्या कानशिलात ठेवून द्या. मी असं का केलं याचा विचार करू नका, असंही त्यांनी स्पष्ट केलं.

राजकारणात पुरूष सर्वसामान्य असतात. महिला सर्वसामान्य नसतात. महिला नेहमीच शक्तिशाली असतात आणि ते आपण दाखवून दिलं आहे, असं सांगतानाच टीव्हीवरील मालिकांमधून महिलांची प्रतिमा मलिन केली जात असल्याचा आरोपही त्यांनी केला.