बलात्काराचा प्रयत्न फसला, इमारतीवरून फेकले

नवी दिल्ली : वहिनीवर बलात्कार करण्याचा प्रयत्न फसल्याने दिराने तिच्यावर चाकूने सपासप वार केले. त्यानंतर इमारतीच्या दुसऱ्या मजल्यावरून तिला फेकून दिलं. तिचं नशीब बलवत्तर म्हणून शेजाऱ्यांनी तिला तात्काळ रूग्णालयात नेलं आणि ती बचावली.
दिल्लीच्या वजीरपूर येथे रविवारी ही धक्कादायक घटना घडली. ही महिला घरात एकटीच होती. या संधीचा फायदा घेत तिच्या २५ वर्षीय दिराने घराचा दरवाजा आतून बंद केला आणि तिच्यावर अतिप्रसंग करण्याचा प्रयत्न केला. त्यामुळे तिने स्वत:चा बचाव करतानाच पतीला फोन करून सर्व प्रकार सांगितला. याच दरम्यान या महिलेकडून फोनचा स्पीकर सुरू झाल्यामुळे तिचा दीर अॅलर्ट झाला. त्यामुळे तो घाबरून घराबाहेर गेला. त्यानंतर थोड्यावेळाने पुन्हा घरात आल्यावर त्याने चाकू दाखवत तिला धमकावले आणि तिच्या चेहऱ्यावर तसेच मानेवर सपासप वार केले, असं या महिलेच्या भावानं सांगितले.
ही महिला अर्धमेली झाल्याने त्याने तिला त्याने ओढत ओढत बाल्कनीपर्यंत नेले आणि दुसऱ्या मजल्यावरून फेकून दिले. मात्र सुदैवाने या महिलेने बाल्कनीबाहेर असलेल्या कुलरला पकडले आणि मदतीसाठी जोरजोरात ओरडायला सुरूवात केली. त्यानंतर शेजाऱ्यांनी तिला रूग्णालयात दाखल केले. तर काही शेजाऱ्यांनी तिच्या दिराला पकडून पोलिसांच्या ताब्यात दिले. रूग्णालयात शुद्धीवर आल्यानंतर या महिलेने दिराविरोधात पोलिसांत तक्रार दिली आहे. यापूर्वीही तिच्या दिराने अतिप्रसंग करण्याचा प्रयत्न केला होता. त्यामुळे तिच्या पतीने त्याच्या कानाखाली मारली होती. या अपमानाचा बदला घेण्यासाठीच त्याने हा प्रकार केल्यास सुत्रांनी सांगितलं.